「Red Bull，送你一對翼！」，不過睇怕Red Bull都幫唔到兩日要踢兩場波嘅紐約紅牛，佢哋今日凌晨喺美聯盃8強對完費城聯，紅牛教練馬殊講到明國內錦標先至係最緊要，因此聽朝喺國際冠軍盃主場對車路士未必會打真軍，輸波就預咗；而車仔一來唔係火力超強嘅球隊，二來班球員亦未操足狀態，估計亦唔會搏，既然兩軍鬥Hea，最宜博細盤。（有線61及201台周四早上8時05分直播）

寸王風格 贏一粒收工
車路士對上一場波，已經係6月頭對戰FC悉尼嘅熱身賽，抖咗成個幾月暑，雖則話呢班球星質素極高，但狀態曳都係唔掂，今場唔係話炒就炒，況且車仔一向都係守強於攻嘅球隊，入波唔會特別多。車仔至今只簽入3個新兵，包括巴西新星尼敦阿倫、門將比高域，仲有最矚目嘅「老虎」法卡奧。代表哥倫比亞參加今夏美洲國家盃嘅法卡奧最近已經飛去紐約會合一班新隊友，但今場就唔會上陣。

其實以「寸王」莫連奴嘅作風，今場肯定唔會派最強陣出戰，估計都係試兵為主，跟住兩場對巴黎聖日耳門同巴塞隆拿先見真章都唔遲。睇怕「寸王」又係要班兵「泊大巴」做好防守先，以唔失波為目標，小勝都唔緊要，就好似上兩場對泰國明星隊同FC悉尼咁，贏一粒就夠數收工。

為免搏殘 紅牛出副選
美聯盃同國際冠軍盃，後者個名就夠晒勁，但實情都只不過係熱身賽盃仔一隻，重要性當然唔及美聯盃，連踢兩場嘅紐約紅牛為免搏殘，今場好大機會派副選應酬了事，加上整體實力同車仔差得遠，但勝在狀態較好，有望頂住車仔，避免大敗一場。