實力超班夫添出擊
歐聯第二圈外圍賽次回合今晚上演，由史達蘭主場迎戰些路迪。呢支冰島班霸喺上屆歐霸盃靠人造草主場爆冷踢走馬瑟韋爾，不過今次對手換成實力差幾班波嘅些路迪，落後兩球下焗攻盞衰多兩錢重，一於撐夫添嘅些路迪開2.15倍「讓客」啦！ （開賽時間：周四凌晨3:15）

史達蘭近8戰主場不勝
首回合落後兩粒嘅史達蘭，日前喺聯賽僅收起阿特利祖漢臣、夏利度保莊臣兩件中場留力，其餘主將悉數登場，最終被踢少個嘅阿克蘭斯逼和1:1，蝕體力、輸士氣唔在講，就連教頭施蒙臣亦坦言呢班波狀態唔掂。就算史達蘭上屆歐霸盃試過靠人造草嘅主場優勢淘汰馬瑟韋爾，不過遇上「蘇超一哥」些路迪根本就屬於兩個層次，況且近8戰主場又未贏過，睇怕佢哋要再創奇迹都幾難。

些路迪射手重拾射門鞋
些路迪新加盟射手施夫斯，雖然佢喺上季蘇超煞科戰噬咬對手，結果被重判停賽8場，好在禁令僅限於蘇超賽場，換句話講，即係可以繼續落場搏殺，火力夠晒保證。首回合後備上陣冇斬獲嘅箭頭利治格菲斯，呢件蘇格蘭國腳日前鬥伊巴大演帽子戲法，狀態明顯提升唔少，今次落場梗要做番齣好戲啦，再加埋史葛布朗、尼亞比頓等猛將鋪橋搭路，強陣出擊嘅些路迪今場作客夠晒本錢炒起史達蘭！