奇帥落柯打穩陣行先
美洲金盃4強戰聽朝開打，打頭陣嘅有美國迎戰牙買加。「花旗軍團」上仗狂數古巴6:0，連續第8次殺入4強，睇落似乎勢不可擋。不過牙買加經過美洲國家盃「特訓」後，防守進步神速，對住阿根廷、烏拉圭等南美列強都係僅輸1粒，況且美國主帥奇連士文揚言要小心牙買加嘅快速反擊，擺明想步步為營，1.62倍入球細好路呀！（開賽時間：周四早上6:00）

牙買加班波勝在硬淨兼爛打，佢哋上個月應邀參戰美洲國家盃，成功幫防線「升呢」，雖然冇分袋走，但連續3場分組賽僅以0:1輸波，就連球王美斯對住佢哋都冇啖好食，證明班波防守有進步。呢條防線轉戰金盃亦繼續發威，牙買加近3戰都係小勝1:0，計落佢哋已經超過320分鐘冇失球，睇嚟佢哋都會照辦煮碗，泊大巴打突擊戰術博偷雞贏波進身決賽。

牙買加有條英超防線
雖然守將艾華斯包維因為紀律問題離隊，好在牙買加仲有一對主力守將韋斯摩根、馬里亞柏鎮守防線，呢對後防孖寶分別効力英超嘅李斯特城同水晶宮，級數有番咁上下，加埋前鋒麥托斯、中場謝禾恩屈臣復出喺前場牽制對手，美國仲點敢擺大個頭搶攻先？

美國僅靠丹普西入波
對手美國上仗大勝古巴6:0晉級，射手丹普西更首度喺國家隊上演帽子戲法，聽落的確係威係勢。值得留意嘅係，古巴賽前爆出球員叛逃風波，班波內部零士氣，冇心機踢先造就美國威番鋪。睇番「花旗軍團」喺分組賽3戰僅入4球，主要靠丹普西入波就知佢哋進攻板斧少。仲有呀，主帥奇連士文賽前特別提醒一眾戰將要注意對手嘅體能同速度，怕且出現老鼠拉龜場面機會極高，諗落都係博入球細夠穩陣。