次熱門墨西哥就會喺四強面對巴拿馬，曾喺2009同2011年連續兩屆贏得美洲金盃冠軍嘅墨西哥，喺今屆賽事一啲霸氣都冇，至今踢咗四場波只有一場喺九十分鐘內擊敗對手，而嗰隊就係剛被美國大炒六蛋嘅古巴。巴拿馬攻力唔強，但勝在韌力夠，今場對住墨西哥有望頂得住，受讓之下巴拿馬讓球主勝值得捧場。（周四早上9時開賽，馬會網上文字直播）

墨西哥陣中有皇家蘇斯達射手卡路士韋拿、維拉利爾中場莊拿芬杜斯山度士、波圖赫達靴里拉等球星助陣，對住千里達、危地馬拉等球隊，贏波可以話係理所當然，但「仙人掌兵團」喺分組賽呢兩場都贏唔到，咁就好難怪球迷喺對危地馬拉一戰向佢哋柴台。去到八強，墨西哥加時要靠一個爭議性12碼先可以淘汰哥斯達黎加，真係贏得一啲說服力都冇呀！

門將賓尼度踢到上身
巴拿馬今場有中場安尼保哥度爾刑滿復出，不過今場食粥食飯都要睇門將賓尼度嘅表現。巴拿馬喺八強以互射12碼淘汰千里達，出線功臣就係効力洛杉磯銀河嘅賓尼度，領隊達里奧高美斯都大讚佢表現出色。依家賓尼度狀態大勇之餘，亦信心十足，有力頂住墨西哥嘅攻門！