幾支箭磨利晒！
明早美洲金盃四強大戰，東道主美國率先上陣迎戰牙買加，美國球星丹普西愈老愈可愛，上仗更大演帽子戲法助美國大炒古巴6比0，銳不可當。呢位32歲前鋒無非想以優秀表現，博取領隊奇連士文歡心，希望重奪隊長臂章，勢必繼續數胡，牙買加睇怕招架唔住花旗兵，直取美國2.2倍讓球主勝。（周四早上6時開賽，馬會網上文字直播）

丹普西喺上月美聯盃粗暴冒犯球證，遭輿論狠批，結果被奇連士文褫奪國家隊隊長之位，由米高巴特利接任。丹普西亦知衰，今屆美洲金盃大踢爭氣波，至今已轟入六球喺射手榜遙遙領先。事實上，丹普西曾經喺英超打滾多年，踢美洲金盃可謂超晒班，只要佢踢出真功夫，要攻陷牙買加大門並唔困難。雖然美國今屆頭幾場賽事入波偏少，但大炒古巴一役令其他進攻球員重拾信心，兩位前鋒艾朗祖漢臣、薩迪斯都成功開齋，相信入波應會陸續有來，尤其是如果牙買加屯重兵看管弗爆嘅丹普西，艾、薩二人肯定有機可乘。

牙買加攻不銳守不穩
牙買加連續三場小勝1比0，表面上踢法好似好穩健，但要留意佢哋嘅對手只係加拿大、薩爾瓦多，以及海地之流，因此牙買加僅能小勝，反而凸顯佢哋攻力依然不濟，今仗若然採取主守，恐怕亦抵擋唔住美國幾位鋒線球員來犯；一旦先失守，焗住要反攻求收復失地時，牙買加隨時輸得更慘，捧美國讓球主勝絕對係不二之選。