3件新兵都有料到
曼聯喺國冠盃首戰旗開得勝後，聽朝再度出擊，去到聖荷西艾華耶球場同聖荷西地震交手。「紅魔」今季引入唔少表現對辦嘅新兵，雖然眾將狀態未操到百分百弗爆，不過今鋪對住頹勢嘅地震，仍然有權輕鬆殺退對手，1.8倍「讓客」要追。（有線64及203周三早上11:05直播）
地震殘陣 留力聯賽
曼聯今季一口氣購入中場迪比、舒尼達連、舒韋恩史迪加等猛將，佢哋亦已喺上仗贏CF阿美利加1:0一役中上陣，3位仁兄齊齊大獲好評：迪比爆發力強，舒尼達連同「小豬」就攻守俱備，其中舒尼達連仲入波幫曼聯奠定勝局添！賽前有消息話，尹戈爾今仗準備派「雙舒」擔正，配合迪比側擊，有齊呢三架發電機提供彈藥，以射手朗尼為首嘅鋒線，又邊使驚冇「餐士」先？
反之，對家地震近期狀態勁曳，上仗鬥洛杉磯銀河慘敗2:5後錄得5連敗，至大鑊嘅係前鋒連赫特、富薛圖休戰，首席射手雲度路斯基又踢緊美洲金盃，今仗真係唔知搵邊個幫手入波嘞。再者，呢班波喺美職西岸排第8位，家陣佢哋踢少兩場，同第6位嘅波特蘭伐木者只係相差7分，隨時留力專注聯賽唔奇。
