與「巴洛戰」同時間開波嘅另一場北美站賽事，由殺聲震天嘅曼聯作客美職球隊聖荷西地震。紅魔接連買入舒韋恩史迪加同舒尼達連，中場真係冇得輸，「大小S」今仗大有機會首度拍住上，誓要向「魔王」尹戈爾證明佢哋先係防中最佳組合，連輸五場慌失失嘅地震，呢次有得震冇得瞓，不妨直取曼聯讓球客勝。（有線64及203台周三早上11時05分直播）

曼聯近年中場長期積弱，尤其係防中只得卡域克較為可靠，「魔王」尹戈爾亦忍無可忍，上周一日之內連買舒韋恩史迪加同舒尼達連；「小豬」雖已「三張」但洞察力強，舒尼達連球風勇悍，被喻為「新堅尼」，日前國冠盃對CF阿美利加更建「頭」功贏波，極速融入新東家。查實紅魔中場勁多人揀，競爭激烈，兩人要站穩防中主力位置唔係話咁易，好彩「爆炸頭」費蘭尼因上季尾輪直紅被逐，新季頭三場聯賽要坐越季波監，尹戈爾講到明呢排唔會用佢，並試用其他球員，造就「大小S」今仗大有機會首次合作，梗係要加多兩錢肉緊啦！

地震王牌前鋒缺陣
地震依家排西岸尾三，佢哋近期變咗慌失失兵團，之前五場輸晒，特別係上場聯賽作客銀河，領先兩球大好形勢下，竟然發波瘟狂失五粒，條防線好似紙紮咁一篤即散。最弊係箭頭雲度路斯基仲替美國踢緊金盃，冇咗呢位王牌射手壓陣，搞到地震攻守都唔掂，想止瀉都有心無力。紅魔新兵「大小S」同迪比初嚟甫到，難得撞正呢舊冇骨魚腩，勢必搏甩髀氹「魔王」，斯維認為佢哋可大勝一場，讓球客勝有買趁早。