利物浦今午將會同阿德萊德聯拍跳，為澳洲之旅畫上句號。之後佢哋就要轉到馬來西亞繼續遠東之行。利物浦差唔多年年夏天都喺轉會市場動作多多，今夏至今已簽入6人，而第7位新兵賓迪基亦差唔多肯定加盟，令隊內位置競爭激烈，雖然只係熱身賽，但一眾「紅軍」都唔敢揸流攤，尤其係前線攻擊球員，誓要爭取入波以博領隊羅渣士歡心，今場捧大最啱數！

（有線61、64、201及203台周一下午5時30分直播）

占士米拿有火 孭起中場
利物浦陣中依家有包括史杜列治、奧歷治、丹尼艾格斯、巴洛迪利、列基林拔同波連尼一共6名前鋒，而英國《每日郵報》報道紅軍已同意以3,250萬鎊（約3.9億港元）簽入阿士東維拉前鋒賓迪基，呢位比利時國腳將於今日前往倫敦接受體測，如無意外將於周中簽約，換言之嚟緊會有7位射手齊齊爭位。雖然史杜列治因傷要抖到10月至復出，「巴神」、列基林拔同波連尼就因為「廢得滯」而有可能被賣走，不過唔代表其餘幾位可以掉以輕心，皆因羅渣士唔多鍾意擺雙箭頭陣攻堅，反而有時會搵拉爾拉拿、拿沙馬高域等人踢前一格，所以前鋒線競爭非常激烈，趁賓迪基未嚟，上場對布里斯班獅吼正選上陣嘅奧歷治同丹尼艾格斯都搏晒命，希望用呢幾場熱身賽證明自己，爭取主力位置。

至於另一新兵占士米拿亦非常有火，熱身賽一啲都冇hea踢，除做好串連前中後嘅工作極具效率外，仲好有隊長風範，有佢壓陣拍住佐敦軒達臣，紅軍條中場線仍然非常強勁。

阿德萊德聯 缺態照搶攻
不過紅軍嘅弱點始終係防守不穩，呢個問題真係講到口臭，但羅帥仍然搵唔到解決辦法，上場派出純防中盧卡斯上陣，仍然係要失波先，都真係幾失禮。阿德萊德聯差唔多有成兩個月冇比賽，狀態當然未弗，不過今場話晒都係喺自己地頭作賽，球員上到場就唔可以縮，一於同紅軍鬥攻，輸都要輸得好好睇睇，咁嘅格局開大當然最正路！