利物浦今夏喺亞洲踢熱身賽，為新一季英超作準備。佢哋上周五對布里斯班獅吼，雖然最後反勝2:1，但係部分主力未入局，搞到贏得都幾辛苦。今場佢哋對住阿德萊德聯，短短3日應該冇乜改善，利記呢場都係小勝格，讓1球3.65倍「讓和」玩得過！(有線61、64、201及203周一下午5:30直播)

落實3.9億買賓迪基
利記喺今夏亞洲之旅首戰，係威係勢大炒泰國明星隊4:0，但上場對住獅吼，出晒主力反而踢得有啲辛苦。其中馬馬度沙高同史卡迪爾一對中堅，唔知係咪放假太開心，對住獅吼不時遊魂，完全不在比賽狀態。前線新兵丹尼艾格斯上場都幾靜吓，係得一次埋門叫有啲威脅咁大把，不過始終佢加盟冇耐，默契點都係差啲，對手如果唔係弱到飛起，都幾難隨心所欲，話表演就表演。

不過各位利迷唔使擔心，始終仲有成個月先開季，嚟緊表現一定會有改善。況且英國《每日郵報》同《BBC》尋晚報道，利物浦已經同意用3,250萬鎊（約3.9億港元）羅致阿士東維拉前鋒賓迪基，呢位比利時國腳今日會去倫敦接受體測，如無意外周中就會簽約。而上場擔正嘅左閘小將約瑟高美斯，表現搶眼到獲得領隊羅渣士大讚，話呢位18歲球員繼續有好表現，新一季升呢上一隊都唔出奇！

澳職季軍「阿德」夫添
相信今仗對住阿德，利記陣容唔會有太大變動，羅渣士大有可能以原陣出擊。阿德萊德聯今夏陣容變化唔大，可以最強人腳應戰。雖然「紅軍」實力比較高，但以佢哋現時狀態，想大炒上季澳職常規賽季軍阿德萊德聯，一啲都唔容易，睇嚟都似係小勝一場，「讓和」有得博。