阿甲呢輪最後3場賽事會喺周二凌晨開始悉數上演，阿King就睇中聽朝嘅壓軸戰，由小阿根廷人主場對聖達菲聯。兩隊暫時都位列中游表現一般，加上近4次交手都打和，可見雙方實力非常接近，阿King相信今仗隨時又會握手言和，一於冷敲2.85倍嘅和波。（周二早上8時10分開賽、馬會網上文字直播）

小阿根廷人上輪輸波但唔使大敗其實好好彩，因為球隊成場波只有1次中龍嘅攻門，而且防守亦麻麻，明顯攻不銳守不穩。小阿根廷人今仗仍有後衞祖亞昆拉蘇繼續停賽，另一後衞尼高拉斯費利同中場加斯柏恩尼基斯有傷唔踢得，至於早前因狀態不足而缺席上場波嘅馬田阿拿尼斯大有機會離隊，今仗就算有主場之利都未必咁易贏到。

4鬥聖達菲聯不分勝負
聖達菲聯剛喺上周三嘅阿根廷盃以0比0打和甘拿斯亞，之後互射12碼被淘汰，實在有啲可惜。聖達菲聯今季攻守發揮其實唔錯，只係球隊作客表現遠遠唔及主場發揮，喺2015年作客只係贏過1場咁大把，反而有4場出現和波，加上今仗有後衞梅里斯奧馬天尼斯累積滿5面黃牌要停賽，而中場科士圖蒙迪路有傷續抖，相信唔會踢得咁進取。兩軍自2011年起4度喺阿甲碰頭，竟然不約而同都係打和，反映雙方實力其實不相伯仲，阿King估計今仗大有機會又會打和，所以冷敲2.85倍和波。