今晚俄超古賓主場對烏拉爾，好有睇頭，事關古賓早前簽下艾沙維同柏夫里約真高兩位老牌射手，令呢對俄國經典組合重現。雖然兩位球星年紀唔細，但始終有級數，應付俄超賽事仍然綽綽有餘，加上對手只係弱隊烏拉爾，相信「雙星」可以幫助古賓旗開得勝，主W有1.65倍咪走寶。（周二凌晨1時開賽）

同樣係81年出世嘅艾沙維同柏夫里約真高，無疑係俄羅斯近10年最有代表性前鋒，包括一齊助俄國爆冷打入08年歐國盃4強，其後登陸英超，分別効力阿仙奴同熱刺，可惜發展平平。不過回流俄超後，重振雄風，艾沙維幫辛尼特奪得上季聯賽冠軍，柏夫里約真高為莫斯科火車頭捧俄盃冠軍，兩人可堪稱「金牌組合」，相信可以大大提升古賓進攻能力。

烏拉爾難擋「艾柏」鋒銳
至於烏拉爾上季僅靠踢護級附加賽，驚險保住俄超位置，最大鑊係上季首席射手史莫洛夫已經轉投卡斯洛達，實力難免打折扣，預料今季又要為護級而戰。雖然新帥干查蘭高上季執教過古賓，非常了解對手，但佢當時領軍成績麻麻，睇怕今仗倒戈難有作為。

另一場阿馬卡主場對卡斯洛達，雖然卡軍只成立7年，但上季已獲得季軍，皆因球會有俄國富商加利斯基支持，投入大量資金發展，陣中擁有3位巴西兵，攻力強橫，有力反客為主，要客W。（周一晚10時開賽）