「仙人掌」表現飄忽
周日美洲金盃8強壓軸戲碼，墨西哥同哥斯達黎加會師美國新澤西州。墨西哥雖為金盃奪冠次數最多嘅國家隊，但呢隊「仙人掌兵」今屆演出飄忽難靠，近8戰得1勝邊有條件讓半一咁多？梗係博分組賽階段未輸過嘅哥斯達黎加下盤啦！（開賽時間：周一早上7:30）

墨西哥領隊米基爾靴里拉為重奪失落一屆嘅金盃，喺較早前嘅美洲國家盃專登搵班二線兵應戰，等卡路士韋拿、古亞達度等「正規軍」可以專注喺金盃搏殺。弊在米帥無論帶住班一線兵抑或二打六都好，「仙人掌兵」嘅表現始終唔多對辦，近8場只得1勝6和1負，12.5%嘅勝出率真係低得可憐。

單睇今屆金盃，墨西哥除咗首輪頭威頭勢6球炒起古巴，跟手鬥最終墊底出局嘅危地馬拉，贏唔到都未算離譜，壓軸一輪鬥千里達，竟然喺12分鐘內連失3球，就算對手喺補時階段擺烏龍送大禮，再度領先嘅墨西哥都「有本事」被逼和4:4完場，今場仲有射手杜斯山度士養傷缺陣，試問主W點捧得落手先？

墨西哥杜斯山度士養傷
哥斯達黎加雖然近況同墨西哥「不相伯仲」，教頭雲祖柏自今年1月底坐正後，8次領軍出戰未贏過，不過佢哋喺今屆金盃分組賽3戰全和，相信今場贏唔到都冇咁易輸！再講之前畀墨西哥食住、試過連輸11場嘅哥斯達黎加，近3次對壘都有啲計仔，取得1勝2和力保不敗，箭頭拜仁雷斯同沙保里奧都有波入，今場話唔定再做齣好戲，受讓抵撐！