巴甲里約打吡爆發！
「細哨」今晚馬拉簡拿開Show！現年35歲嘅朗拿甸奴回歸巴甲，今晚雖然未能夠為新東家富明尼斯處子登場，但呢位前世界足球先生將會喺「足球聖殿」上演回歸騷，仲講明會帶埋「細哨兵團」助威。富明尼斯後台咁猛，要炒起華斯高Easy Job啦，呢場「里約打吡」，博3.25倍「讓主」。（開賽時間：周一凌晨3:00）

「里約打吡」加埋朗拿甸奴回歸Show咁精彩，難怪今戰波飛勁搶手，截至前晚為止已賣出兩萬張波飛，巴西傳媒估計臨場會有近4萬球迷，以今時今日嘅巴甲嚟講算係好瘋狂，證明「細哨」號召力十足。朗拿甸奴會喺開波前兩粒鐘出席記者會，並着起富明尼斯波衫落場亮相，跟住就會踩入更衣室為一班新隊友打氣。

細哨「聖殿」助威

華斯高殘陣聽炒
據《環球報》所講，朗拿甸奴暫時未操起狀態，預計最快要去到下月2號先會為富明尼斯處子披甲，倒戈面對母會甘美奧，雖然「細哨」今晚只係會坐喺包廂睇波，但佢賽前就喺instagram「鋪」相，預告會帶埋一班「細哨兵團」殺入馬拉簡拿助威，真係撐到盡。

其實有冇「細哨」撐，富明尼斯贏面都好高，畢竟自從莫里拉季初接掌隊波之後，領軍11戰足足搶咗24分，衝擊創會第5個巴甲錦標在望。中場悍將比亞爾今仗傷愈復出，前線就繼續由費特衝鋒陷陣，有前又有後，信得過！

對家華斯高今季贏過兩場咁大把，13戰入5球嘅鋒力更加係弱盡巴甲，況且中場迪根奴、守將尼爾同門將馬田施華仲養緊傷，去到富明尼斯地頭聽炒都似！