主場無敵Vs弗到爆燈
今輪日職重量級戲碼，由首階段盟主浦和紅鑽主場迎戰廣島三箭。紅鑽仍屬今季不敗之師，喺自己地頭出擊更係贏到開巷，不過「一哥」三箭踏入次階段火力全開，近兩仗狂轟10粒唔係人咁品，尤其係王牌佐藤壽人只差3球，便成為日職史上士哥王之一，今仗必定搏甩髀爭取入波，呢場乃癲鳳鬥狂龍格局，斯維寧捧入球大。（有線61及201台周日晚6時直播）
紅鑽今季一洗近年經常臨尾香嘅陋習，攻守兼備，並創下日職最佳開季紀錄，令佢哋以12勝5和不敗佳績勇奪首階段冠軍，雖然去到次階段頭兩仗(都係作客)只係勝和各一，比起早前強勢略為收斂，但睇番佢哋喺首階段主場9仗全勝，喺自己地頭出擊特別惡，真係連個和字都唔識寫。兩大前鋒興梠慎三同武藤雄樹又當弗，頻頻入波交足貨，今仗只得後衞那須大亮坐波監，隨時以攻代守狂砌三箭。
佐藤壽人衝日職入球紀錄
不過三箭亦唔係好恰，踏入次階段更加着晒火，繼首仗以4比3險勝仙台維加泰後，上仗更狂派松本山雅6隻光蛋殺上榜首，火力全開勁到冇朋友。儘管王牌佐藤壽人對山雅之役竟然食白果，不過呢位老牌射手質素唔使懷疑，睇番佢目前喺日職總共累積154個入波，為現役球員之冠，只要入多3粒，就可追平前日本國腳兼傳奇前鋒中山雅史保持嘅157球紀錄，榮升日職史上士哥王之一，勢必激起佐藤壽人嘅鬥心，紅鑽後防真係有得震冇得瞓。一隊弗到漏油，另一隊進攻大過天，隨時合演入球騷，與其估邊隊贏，斯維覺得轉玩大盤最穩陣。
