遠東之旅轉戰澳洲
利物浦遠東之旅首站淨勝泰國明星隊4粒後，第2站轉赴澳洲鬥布里斯班獅吼，新任隊長佐敦軒達臣講明要做得比泰國站更好，難為獅吼新帥艾萊斯唔識死，喺缺少靈魂人物麥特麥基之下，竟然要用盡所有正副選球員，等大家都可以同「紅軍」較量，咁搞法想唔輸鑊甘都難，一於追1.9倍「讓球客勝」！ （有線61、64、201及203周五下午4:45直播）

「紅軍」上仗4球炒起「泰星隊」，祖奧卡路士、佐敦軒達臣分別交出2助攻，造就拿沙馬高域、馬馬度沙高、拉爾拉拿同處子亮相嘅奧歷治各省1粒，總算有個好開始。

新隊長落柯打踢好波
仲有呀，佢哋班戰將只得45分鐘騷哥利，唔怪得個個落到場都搏到盡啦！如果想箍實領隊羅渣士個心，奠定自己喺「紅軍」嘅正選位置嘅話，又點敢偷懶先，更何況隊長佐敦軒達臣落晒柯打要踢得更好，今場要贏2、3粒話咁易啦！

獅吼戰將人人有份踢
另邊廂嘅獅吼新帥艾萊斯上任唔夠2個月，對呢班波嘅了解程度成疑唔在講，執教經驗唔多嘅佢，首度領軍就要硬撼利物浦，唔驚就假！最弊係隊長麥特麥基星期一至歸隊復操，一早講明今仗唔會冒險落場，艾萊斯仲懶體貼話，明白今次鬥利物浦機會難逢，暗示會畀所有球員上陣。老實講，獅吼原本強陣都唔夠利記砌啦，澳職又未開咧，成班波狀態又唔fit，艾萊斯今次咁搞法，睇怕都係難逃大敗咯。