美洲國家盃王者戰聽朝爆發！「潘帕斯雄鷹」阿根廷火併衞冕冠軍智利，重演上屆決賽翻版。阿根廷今屆5戰全勝狂轟18球，啱啱喺上周五度過29歲生日嘅美斯為首奪國際賽冠軍，加上要報上屆決賽飲恨之仇，肯定會施展渾身解數，一眾隊友亦希望搶美洲盃送畀佢做生日禮物，以阿根廷目前狀態咁弗，主勝值捧。（now 650周一早上8時直播）

5戰贏晒狂轟18球
經過上屆大熱倒灶後，阿根廷今屆奪冠決心更強，一開波立刻入局，今屆5場賽事贏晒喪入18球，分組賽首仗喺美斯缺陣下照贏智利2比1，之後4仗全部贏對手3球或以上，極具王者風範。依家美斯已斬獲5個入球排射手榜次席，其拍檔希古恩亦有4球進帳，希古恩正係上屆決賽射失12碼嘅輸波罪人，今屆捲土重來，肯定搏命一雪前恥。

智利自首仗不敵阿根廷，其後4仗全勝，包括8強狂數墨西哥7比0。不過阿根廷對住智利特別有辦法，近5次交手法定時間錄得4勝1和佳績，明顯格食格。「潘帕斯雄鷹」雖有前鋒拿維斯缺陣，但仲有阿古路同奧斯華度加坦可頂上。何況美斯正力爭首個國際大賽錦標，勢必火力全開爆破智利，主勝必捧。