阿仙奴-3照撐
兩年一度嘅巴克萊亞洲錦標賽今晚爆發，今屆移師新落成嘅新加坡國家體育場舉行，首次參賽嘅英超勁旅阿仙奴，喺今晚尾場重頭戲火併東道主新加坡明星隊。雖然今仗只係阿仙奴開操後首場熱身賽，但新加坡明星隊乃烏合之眾，對親外隊都腳軟，而且新加盟嘅鋼門施治大有機會處子登場，兵工廠預計可大勝一場響頭炮兼躋身決賽，斯維建議直取讓球客勝。（now 621周三晚8時30分直播）
兩年前曼城喺香港勇奪巴克萊亞洲錦標賽冠軍，呢項推廣英超嘅賽事喺亞洲大受歡迎，今屆輪到新加坡做東，有三支英超球隊參加，除愛華頓同史篤城之外，焦點當然落喺首次參賽嘅阿仙奴身上。以往阿仙奴主帥雲格唔多想季前熱身賽太過舟車勞頓，多數會留番喺歐洲，不過藉「拍跳」到美洲或亞洲掘金兼宣傳乃大勢所趨，阿仙奴自2011年起亦打破慣例，3年前曾訪港對傑志，致力開拓亞洲市場。
講番今晚場波，阿仙奴雖有王牌阿歷斯山齊士、韋碧克、路斯基、奧斯賓拿等冇隨隊，但仍有奧斯爾、韋舒亞、艾朗藍斯、基奧特、禾確特等主力壓陣。相反，新加坡明星隊以當地球會新加坡十二獅嘅球員為主，配合洛迪高杜斯、尼高拉斯華利斯、施里拿卡馬拉等不知名外援組成，猶如拉雜成軍，睇番佢哋上年表演賽慘吞祖雲達斯5蛋，同前幾年對馬德里體育會及般尼都輸波兼冇士哥，完全唔夠班，難得有機會同世界級勁旅切磋，橫掂都輸硬，呢支東道主嘅球員志在賽後交換波衫，或同球星玩Selfie。
施捷斯尼衰吸笑氣明益施治
而且阿仙奴門將施捷斯尼繼上季煲煙後，日前喺派對又被影到佢吸笑氣，呢個衰仔咁唔生性，主帥雲格雪佢唔奇，意味新加盟嘅鋼門施治今仗好大機會為新東家首度披甲，呢位捷克門神一向以穩健見稱，有佢鎮守防線，令前面嘅基奧特、禾確特等無後顧之憂盡情數胡，加上阿仙奴對親「明星」都有一手，13年狂數印尼明星隊7粒，11及12年亦贏過馬來西亞明星隊，實力普通嘅新加坡明星隊凶多吉少，阿仙奴可大炒對手殺入決賽，就算要讓三球都冇有怕，照揀讓球客勝。
