2015年英超巴克萊亞洲錦標賽喺新落成嘅新加坡國家體育場進行，尾場有風頭躉陪大家食晚飯，新加坡明星隊對阿仙奴唔似爆得出。事實上，近年新加坡對外隊例牌冇運行，相反兵工廠可以話「專食明星」，加上鋼門施治首次登場，讓3球都要揀2.1倍「讓球客勝」。（now621台周三晚8:30直播）

新加坡明星隊有幾叻，大家諗番上年佢哋淨吞祖雲達斯5蛋就知，加上佢哋之前對馬德里體育會同般尼都輸波，期間1球都未入過，擺明每次只係柴娃娃落場等換波衫。今次陣中所謂嘅明星外援，最巴閉嘅巴西前鋒洛迪高杜斯只係踢過祖恩維爾，教練Sundram尋日賽前記招大讚門將Izwan有力去日職或韓職搵食，但就強調今場一定唔會「泊大巴」死守，希望搵方法進攻爭勝，咁搞法即係畀阿仙奴騷攻擊力囉！

「新星隊」對外隊全敗
另一方面，阿仙奴王牌阿歷斯山齊士為智利捧走美洲國家盃後，延長假期未歸隊，隊長阿迪達續約後又話未好番，但其餘幾個冇歸隊球員例如前鋒韋碧克同中場路斯基，都唔算係主力，更何況兵工廠近年喺表演賽「專食明星」，13年數印尼明星隊7蛋、11同12年連續2年贏馬來西亞明星隊，唔捧點得？

施捷斯尼吸笑氣被雪藏
再講，近日施捷斯尼被踢爆吸笑氣闖禍，呢場兵工廠幾乎肯定會派新加盟嘅施治把關，佢已經講到明話，轉會後首次上陣好重要，絕對會認真對待。只要佢保持不失，阿仙奴大勝嘅機會就更加大，加上領隊雲格誓神劈願話唔會賣中場奧斯爾，照計佢都要趁未開咧交貨，證明自己值得留低啩？