頭場上演全英超對壘，愛華頓出戰史篤城，兩隊今夏都有人腳變動，「拖肥糖」愛華頓貴精不貴多，簽入巴塞前鋒迪路菲奧、曼聯中場湯卡華利，配合盧卡古、巴利、米拿拉斯，中前場陣容鼎盛。史篤城失去鋼門比高域，簽下39歲老將基雲頂檔，接收埋格連莊臣、雲堅基爾等棄將，舢舨充炮艇，隨時一起航即沉，捧愛華頓主W。

（now 621周三晚6時直播）

愛華頓本身人腳唔錯，領隊馬天尼斯毋須大執，包括簽番迪路菲奧，佢曾喺13/14年球季以外借身份為「拖肥糖」効力，表現唔錯，呢位21歲西班牙小將技術出色，同盧卡古一剛一柔組合，應該可以擦出火花。米拿拉斯留隊亦對「拖肥糖」有大鼓舞，呢位比利時國腳日前熱身賽對史雲頓梅開二度，狀態唔錯。美中不足係左閘巴尼斯因傷缺陣，但防線仍有菲臘積基爾卡支撐大局，令人放心。

史篤城放走比高域中門大開
史篤城出售門將比高域畀車路士，搵嚟基雲，以及23歲丹麥門將賀加特填補空缺，但前者年事已高，無復當年勇，後者之前只効力丹麥球隊米迪蘭特，恐怕未夠班擔大任。至於由利物浦來投嘅後衞格連莊臣近年表現每況愈下，車仔借將荷蘭中場雲堅基爾只屬「人球」，無助提升球隊實力。史篤城今仗都係要靠高治、查理阿當數胡，但獨力難支，形勢唔樂觀。