美洲金盃A組最後一輪賽事，上演上屆決賽翻版，美國對巴拿馬！東道主美國已提早獲得小組首名出線8強，今仗領隊奇連士文或會收起部分主力休息，不宜高估。巴拿馬兩戰皆和，仲要搶分爭出線肯定搏老命，巴拿馬受讓，讓球客勝值得一試。（周二早上9時30分開賽、馬會網上文字直播）

美國或收起丹普西
論牌面美國喺A組鶴立雞群，但呢支上屆冠軍兩場分組賽都係「煲魚生粥」僅贏一球，上仗鬥海地，全場只得5次射門，僅及對手三分之一，但卻贏1比0，可見奇連士文嘅戰術講求實際，既然穩奪出線權，更加唔會搏。值得一提，美國兩戰所入3球全部由丹普西包辦，但「丹爺」畢竟已經32歲，相信奇連士文今仗會畀佢抖下，留力淘汰賽。

至於巴拿馬係上屆亞軍，今屆兩戰都係先開紀錄，可惜同樣比賽末段被逼和，非常唔抵，更加激起球員爭勝鬥心。巴拿馬上屆決賽都係僅以0比1不敵美國，今仗趁對手放軟手腳，有望成功偷雞。

同組海地對洪都拉斯，兩隊同得1分在手，想出線就要擸足3分先夠穩陣。海地世界排名79，洪都拉斯排80，雙方實力接近，咁高咁大，亦冇理由向對手示弱。預料兩隊會鬥攻，首選入球大。（周二早上7時開賽、馬會網上文字直播）