英超今晚爆曼市打吡，曼城主場火併曼聯。兩軍為爭前4必打甩髀，尤其曼城幾經辛苦先請到名帥哥迪奧拿下季執教，都唔想佢「降呢」帶隊打歐霸，近6次鬥曼聯贏足4次，擺明格食格，況且歐聯入到8強士氣大振，亦比喺歐霸出局嘅「紅魔」多2日休息，「藍月亮」瓣瓣秤贏，今場勢必KO死敵鞏固前4，主勝有買趁早。

（now 621周一凌晨零時直播）

曼市雙雄今季爭奪聯賽機會渺茫，但現時爭前4嘅歐聯席位緊湊，未計昨晚賽果，排第4嘅曼城只比緊隨其後嘅韋斯咸與曼聯多2分及4分，絕非坐定粒六，連曼聯主帥尹戈爾賽前都話，若果打吡戰輸波被甩開7分，要殺上前4就難上加難。不過「藍月亮」更加緊張，事關早前高調宣布哥迪奧拿下季來投，高層都唔想呢位名帥屈就打歐霸咁失禮，呢張歐聯入場券不容有失。

士氣體力秤贏曼聯
翻查雙方近6次交手，曼城錄得4勝1和1負佔上風，若果單計近4次主場鬥同市死敵，仲贏咗3次，擺明食住曼聯。睇番兩軍上周中都有歐洲賽，但命途迥異，曼城喺歐聯淘汰基輔歷史性躋身8強，相反曼聯喺周五凌晨歐霸16強畀利物浦淘汰，同士氣高昂嘅曼城差天共地，而且「藍月亮」仲多兩日抖兼有地利，可謂以逸待勞。

紅魔近5客戰輸4場
曼城中堅高柏尼因傷缺陣，但曼聯前鋒朗尼仲未好番，新星「福仔」拉舒福特爆出後無以為繼，連續5場食白果，呢5仗成隊入得3粒咁大把，火力疲弱。加上「紅魔」近5仗作客輸咗4仗，包括不敵新特蘭及米迪蘭特等弱旅，今仗造訪志切搶Ｗ嘅曼城好難全身而退，「藍月亮」主勝有1.69倍咪錯過。