今晚上演俄羅斯超級盃，由上季俄超冠軍辛尼特，決戰上季俄盃盟主莫斯科火車頭。辛尼特呢排被主力有意出走消息困擾，加上備戰工夫唔足，想大勝一場難度唔細。好在班波勝在人腳質優，不妨冷敲3.2倍「讓球和」，博佢哋小勝捧盃。（開賽時間：周日晚11:00）

韋素傳離隊備戰唔足
兩軍同樣贏過兩屆超級盃冠軍，經驗可謂不相伯仲。不過今仗喺辛尼特地頭柏度夫斯基球場舉行，呢支俄超班霸點計都有着數，但講到要炒起對手筆者就有啲保留。皆因佢哋3日前諗住同保加利亞球隊盧多格德斯拍跳，可惜因為半途落大雨取消，搞到班波至今踢得兩場熱身賽，狀態唔慌好得去邊。更重要係陣中傳出中場韋素有意轉投AC米蘭，皇馬亦有意搵番中堅加雷回巢，對士氣或多或少都有啲影響。好在佢哋勝在兵力優厚，由上季神射手侯克搭住老牌前鋒基沙哥夫攻堅，火力依然有睇頭。

火車頭高層唔信新帥
另邊廂嘅火車頭，雖然暫代領隊卓利夫真高正式擔正，不過班高層似乎唔多信任呢位新帥，只係同佢簽約1年，外加1年優先續約條款，咁樣好難鎮得住手下班球員啫。何況火車頭近5仗同辛尼特交手，有4次都輸1粒，既然佢哋今季人腳冇太大變動，想扭轉命運睇怕唔易喎！