澳職今日下晝上演榜首大戰，墨爾本城主場擺擂台恭候布里斯班獅吼。雖然墨爾本城排第4位，但只係同榜首嘅獅吼相差3分，只要佢哋今仗震散獅吼，即可憑較佳得失球壓過對方升呢做「一哥」，鬥志唔使懷疑。以墨爾本城連續5次主場擊敗獅吼嚟睇，今仗要贏並唔難，小讓平半梗要撐1.97倍上盤。（有線64及203周五下午4:40直播）

墨爾本城今季最大優勢梗係火力夠猛，聯賽23戰入55球，堅令人放心。雖然班波上個月稍有回落，但嚟到3月作最後出衝刺嗰陣，隨即連贏2鋪重上勝軌。更難得嘅係，仲改善埋後防不穩問題，最近2仗分別以1:0同3:0淨勝阿德萊德聯同FC悉尼，連唯一死穴都冇埋，呢鋪主場鬥獅吼的確值得睇高一線。

獅吼作客輸親大大鑊
雖然對手獅吼最近2鋪同樣取勝，但就喺主場出擊，佢哋一作客演出就唔多掂，近4場作客輸3鋪，仲要輸親都大大鑊，分別以0:3、3:6、0:4輸畀阿德萊德聯、珀斯光輝同墨爾本勝利，咁樣好難捧得佢哋落手啫。再睇埋獅吼連續5次作客墨爾本城均敗陣而回，今次想喺近8場主場取得6勝2和嘅墨爾本城身上搶分，好難喎。