兩戰得1分 打「和」都唔制
亞冠盃H組賽事今晚演重頭戲，上屆冠軍中超嘅FC廣州（廣州恒大淘寶）主場鬥日職代表浦和紅鑽。FC廣州踢咗兩場分組賽只得1分，為保出線希望再冇失分空間，好在佢哋亞冠盃近9次主場對日職兵7勝1和1負，加上貴價射手積臣馬天尼斯漸入佳境，有力擊敗作客腳軟嘅紅鑽，阿謙推介1.55倍主勝。

（now 672周三晚7時30分直播）

FC廣州分組賽第一場打和浦項制鐵，之後更以1比2輸畀FC悉尼，現時得1分排小組包尾，如果今仗再失分就危危乎。FC廣州近年主場鬥日職球隊特別有計，近9仗勝7次，季前高價加盟嘅哥倫比亞前鋒積臣馬天尼斯已經喺中超「開齋」，另一射手列卡度高拉特近期亦保持水準，相信有助球隊攞到入波。

紅鑽對上兩次出戰亞冠盃分別喺2013及2015年，當中分組賽兩次作客「訪華」都輸波而回，而且呢兩屆同樣喺分組賽出局，水準明顯未夠班。紅鑽今屆分組賽首仗能夠主場擊敗FC悉尼，全因對手當時部分主力未有隨隊，上仗作客浦項制鐵打回原形輸0比1，今仗造訪FC廣州相信凶多吉少。

山東迎首爾「大」駁火
另外兩場直播賽事，先有FC山東主場對FC首爾。FC山東首兩輪分組賽全勝，全賴巴西射手迪亞高泰達利交足功課，今仗主場鬥同樣兩戰全勝兼入10球嘅FC首爾，相信會演入球騷。（now 670周三下午3時30分直播）

另一場由廣島三箭主場對泰國球隊武里南聯，三箭近況雖然麻麻，但今仗對手武里南聯係正牌「魚腩」，分組賽兩連敗1球不入兼夾狂失9球，三箭主場出擊應可大勝一場挽回面子，一於捧讓球主勝。（now 670周三晚6時直播）