曼城目標保優細
周三凌晨歐聯16強次回合，英超曼城主場迎戰烏克蘭基輔戴拿模。藍月亮首回合作客贏3比1，實力明顯高基輔一班，不過佢哋嚟緊周末會喺曼市打吡硬撼曼聯，心態上或會有所保留。基輔以往作客英格蘭未贏過，想翻盤恐亦有心無力，預計藍月亮今仗會歎慢板等收工，大細中位數調2.5／3球，推介入球細。
（有線61、64台周三凌晨3時45分直播）
留力曼市打吡
曼城上周末聯賽作客0比0打和諾域治，不但被榜首李斯特城愈拋愈遠，爭冠似乎已經冇乜希望，而且領先後面嘅韋斯咸同曼聯嘅優勢唔多，藍月亮依家最重要係力保前4爭取來屆嗰張歐聯入場券，因此周末主場對同市宿敵曼聯更加不容有失。曼城2月份因兼顧英超、英聯盃、英足盃及歐聯4條戰線，幾乎個個禮拜都係一周雙賽，真係鐵人都散，佢哋近期喺聯賽先後不敵李斯特城、熱刺同利物浦等前列對手，已睇到佢哋疲態畢露，難得呢場只要保住首回合優勢就搞掂，球員當然唔會急於搶攻，浪費體力，預計曼城會用「拖」字訣，盡量減慢比賽節奏，但求控球在腳搓到完場。
基輔作客英倫戰績差
基輔想反勝晉級今仗必須攻入3球先至有價講，可惜佢哋過去13次作客英格蘭球隊錄得2和11負，包括今屆分組賽1比2不敵車路士。首回合所見，佢哋無論速度、狀態都比唔上曼城，莫講話作客要入3球咁多，甚至要入到波都絕對唔容易，捧入球細啱數。
