英超今輪壓軸好戲，榜首李斯特城主場迎戰尾二嘅紐卡素。「喜鵲」啱啱請到名帥賓尼迪斯救亡，佢被皇馬炒魷後第3度征戰英超，矢志省番靚招牌，點秤都比「狐狸」老帥雲尼亞里更多計仔，加上「肥賓」十多年來「轉飯鑊」後聯賽首仗未輸過，新帥效應下，必揀受讓嘅紐卡素讓球客勝。

（now 621周二凌晨4時直播）

李斯特城 爭標直路壓力大
雖然賓尼迪斯於今季季中先畀皇馬炒魷，但佢曾於05年及13年帶領利物浦同車路士贏過歐聯同歐霸冠軍，因此佢喺英超仍有好高江湖地位，適逢紐卡素上周怒炒麥卡倫，令「肥賓」獲得回歸英超嘅機會。可能你會覺得賓帥今次嚟教紐卡素有啲屈就，不過經過今季喺「銀河艦隊」嘅屈辱後，好多人認為佢已Out，但如佢能拯救「喜鵲」護級成功，唔單止可額外袋走300萬鎊（約3300萬港元）獎金，亦有可能令佢鹹魚翻生。

查實賓尼迪斯同李斯特城領隊雲尼亞里都有啲淵源，02及04年佢憑住雲帥及古柏留下嘅班底，帶領華倫西亞兩奪西甲，之後佢轉教利物浦，「蝙蝠兵團」就搵雲尼亞里回巢，短短一季雲帥就將呢支冠軍雄師搞到連歐聯入場券都保唔住，可謂高下立見。當然，李城今季異軍突起，雲尼亞里係功不可沒，但呢位老帥從未帶隊拎過頂級聯賽冠軍，每每於關鍵時刻受壓而崩潰，以往佢執教車仔、羅馬、摩納哥都係二奶命已有辦你睇，咪以為「狐狸」依家排第1形勢大好，能否頂住心理包袱先至係關鍵。

戰術大師 轉工首戰有料到
翻查紀錄，由2001年賓尼迪斯轉投華倫西亞計起，15年來6次轉新東家嘅首場聯賽，錄得2勝4和未嘗敗績，數據堅挺。呢場係「肥賓」回歸英超首擊，梗係唔衰得，睇番紐卡素喺打少一場下，落後「安全線」尾四嘅新特蘭1分，護級未絕望，而且踢走麥卡倫後軍心大振，讓球主客和「喜鵲」受讓1球，斯維撐讓球客勝。