賓尼迪斯急泊大巴
貴為英超老牌球隊之一，紐卡素今季長期喺降班區域打滾，最終管理層痛定思痛，上周五決定辭退領隊麥卡倫，搵嚟戰術大師賓尼迪斯執教。肥賓出名踢防守足球，呢次作客榜首李斯特城邊會鬥攻咁蝕底，實行泊大巴盡力搶分止血。以「狐狸」疲弱嘅主場火力，想咬多「喜鵲」兩啖唔容易，2.02倍入球細值得一試。

（now621台周二凌晨4:00直播）

沉淪咗大半季嘅紐卡素，終於決定改任賓尼迪斯執教鞭，務求喺最後關頭發力逃出生天保住英超席位。名宿舒利亞就大讚呢個決定，認為有肥賓幫手令「喜鵲」護級機會大增：「如果球隊一直唔變，我唔認為可以護到級，但賓尼迪斯嚟到就畀咗球隊一大機會。」佢仲話紐迷一定會歡迎呢位新帥添。

講真吖，以履歷計賓帥真係唔差得去邊，過去執教英超就幫過利物浦、車路士奪得歐聯、歐霸盃冠軍，憑佢豐富經驗有力帶領紐卡素回上正軌。何況過去幾季「喜鵲」無論排名最終如何，防守都係聯賽最差嗰幾隊，呢次搵以防反戰術見稱嘅賓帥執教，可預期隊波嘅防守會有改善。但考慮到賓帥只係上任幾日，執得防守未必顧得掂進攻，以呢班波對上20場英超作客食13場白果紀錄嚟睇，唔排除賓帥直接泊大巴，盡力減少失球機會。

李城主場火力遜作客
隨住曼城前日作客諾域治失分自毀長城，李斯特城梗係最開心，呢鋪迎戰紐卡素自不然想再下一城。之不過「李城」同樣至叻踢防反，結果主場嘅入球數字反而比作客低。連盃賽在內，「狐狸」近7次主場出擊，竟然只係入得8粒，仲有3場要食白果添。一對士哥拿占美華迪同馬列斯亦冇季初咁sharp醒，近4鋪只係各入1粒，火力不宜高估，加上「喜鵲」亦要搏命搶分，「狐狸」呢鋪開大餐機會唔慌高。