今晚英格蘭足總盃8強大戰，衞冕嘅阿仙奴主場硬撼屈福特。阿仙奴上周中先於重賽贏波晉級，話咁快就要打8強賽事，真係疲於奔命，最弊係嚟緊周中仲有歐聯16強對巴塞嘅生死戰，眾將分心在所難免，面對冇後顧之憂嘅屈福特未必易o趙，讓球盤阿仙奴仲要讓一球，斯維寧撐「大黃蜂」下盤。

（樂視818周日晚9時30分直播）

斯維唔會懷疑阿仙奴衞冕足總盃嘅決心，但佢哋近期賽程鬼咁密，上周末聯賽打少個下逼和死敵熱刺2比2，去到上周中再喺足總盃16強重賽贏侯城4比0，表現略見起色，但踢得密都咪話唔攰。而且對侯城之役，阿仙奴中場艾朗藍斯、守將梅迪薩卡及基比爾包列斯達先後傷出，「藍神」肯定要抖4周，主帥雲格雖然話梅迪薩卡及基比爾包列斯達只係輕傷，但點都有影響，另一中堅哥斯尼亦因傷上陣成疑，今場防線存隱憂。

阿仙奴傷疲雲帥幾頭痕
最令斯維擔心嘅，阿仙奴於歐聯16強首回合主場淨吞巴塞兩蛋，嚟緊周中要作客魯營打次回合，好多球迷都唔認為佢哋可以反勝晉級，但主帥雲格向來對歐聯心存僥倖，隨時今仗留力到歐聯再搏過。就算「雲爺爺」肯多派幾名主力，但佢哋個心會放喺足總盃定歐聯呢？

相比之下，屈福特就專心得多喇，佢哋依家護級壓力唔大，有餘力於盃賽發圍，可能球迷見到「大黃蜂」兩連敗唔多開胃，但呢兩仗佢哋係力戰下僅輸畀曼聯同榜首李斯特城1粒，表現唔失禮，趁住阿仙奴攰到爆兼分心下，絕對有力一戰，仲有得受讓一球，呢個下盤捧得過。