適逢創會20周年，北海道札幌岡薩多今季決心衝日職，今日佢哋响日乙主場迎戰FC愛媛，更加搞咗唔少慶祝活動吸客，但係愛媛呢季防守力提升，札幌亦都連續8年主場揭幕戰未Ｗ過，都係小注博吓個1.82倍半場和陣啲。
（開賽時間：周日中午12:00）
3月份嘅札幌仲係好凍，今日有雨夾雪，溫度介乎攝氏3度至零下3度，咁嘅環境一般嚟講對客隊唔着數，不過札幌今場連呢樣主場之利都冇埋喎，事關場波安排喺札幌Dome呢個室內場上演，愛媛班人冇變雪條嘅危險，札幌惟有靠自己嘅實力同班球迷打氣爭呢3分。查實札幌嘅主場優勢真係冇乜，佢哋自從2007年主場揭幕戰1:0贏過鳥棲，跟手8年都冇法子喺自己地頭打響頭炮，今次係9連不勝定終於破咒，已經成為日本媒體嘅話題。
假如由人腳名氣去講，札幌起碼高愛媛半班，上場佢哋大炒FC岐阜4蛋，前鋒都倉賢大演帽子戲法，更加畀人一種全隊開始上力嘅感覺。但係札幌其實傷兵唔少，中場大腦小野伸二左邊臀部拉傷肌肉，今日唔出得，另一件前日本國腳稻本潤一亦可能倦勤，就得件北海道土產中場石井謙伍剛啱傷愈，嚴格嚟講中場線都未算夫添。
連和清水同山形 愛媛防衞指數升
更重要嘅係，札幌件鋒將都倉賢雖然夠弗，可惜佢上季個好拍檔拿沙列已經約滿離隊，今季換咗個巴西兵雷斯（Jonathan Reis）做Partner，呢條友係有啲來頭，曾經去荷蘭踢過PSV燕豪芬同維迪斯，不過衰在係個攪屎棍，曾經試過食禁藥、醉駕……，26歲就响歐洲立足唔到，返到巴西亦只能夠喺省聯盃搵食，應該叻極有限，而且佢上場有份落場，但同隊友夾得唔順，冇默契可言，今晚遇到防衞指數上升、開季接連逼和上季日職分子清水同山形嘅愛媛，相信好難有突破性演出，札幌想旨意佢同都倉賢閃電攻陷愛媛唔易，都係博半和保險啲。
