另一場英足盃8強賽事，「紅魔鬼」曼聯主場迎戰「錘仔」韋斯咸。曼聯啱啱喺歐霸盃16強輸畀利物浦，周中又要應付次回合，連場激戰體力消耗大。錘仔今季出晒名係「名牌殺手」，除喺英足盃淘汰利物浦外，聯賽鬥曼城、阿仙奴、車路士及今場對手曼聯都未輸過，受讓捧讓球客勝。

（樂視818周一凌晨零時直播）

曼聯晉級路途冇說服力
曼聯目前仍在英超、歐霸及英足盃三線作戰，領隊尹戈爾日前講過最大目標係拎到下屆歐聯入場券，故此喺佢心目中英足盃排位應該係最低。紅魔接連喺聯賽、歐霸盃輸畀西布朗同利物浦，而且兩場都冇入波，新星拉舒福特冇晒影，紅魔今屆喺英足盃淘汰嘅全部都係英冠或英甲球隊，表現冇太大說服力，今場對手韋斯咸依家英超排名仲高過紅魔一位，紅魔爭勝料會遇上一定阻力。

韋斯咸近況相當唔錯，聯賽連盃賽已經連贏四場，包括擊敗爭標分子熱刺，計埋佢哋今屆英足盃第四圈淘汰利物浦，「錘仔」今季喺各項賽事對曼城、阿仙奴、車路士、利物浦及曼聯都未輸過，堪稱「名牌殺手」，皮耶等一班攻擊好手弗到漏油，作客奧脫福贏埋唔奇，受讓好路。