今晚英格蘭足總盃8強重頭戲上演「雙藍」對決，由愛華頓主場迎戰車路士。車仔啱啱失意歐聯，堂堂上季雙料冠軍豈可兩手空空？足總盃就成為佢哋今季嘅最後救贖，必定搏甩髀，但車仔防線唔多穩陣，撞正「拖肥」倒戈射手盧卡古壓陣，火力唔係人咁品，近4次交手3度開大，隨時又做「大」騷，斯維力撐大盤。

（樂視818周日凌晨1時30分直播）

車仔自季初被前任主帥莫連奴搞到一鑊粥後，元氣大傷，就算老帥希丁克中途接手表現回穩，但佢哋仍未能重拾上季勇奪聯賽及英聯盃嘅王者風範，啱啱周中於歐聯16強遭聖日耳門淘汰出局，無論演出或信心都輸晒畀對手。當然，車仔為免冇盃落袋，足總盃就成為佢哋今季唯一捧盃希望，單計本土賽事，希帥麾下嘅車仔總算保持16場不敗，就算兩大主將迪亞高哥斯達及夏薩特因傷應趕唔切披甲，但眾將戰意唔使懷疑。

不過車仔自兩大中堅泰利及葛特蘇馬受傷後，防線明顯穿窿，代替佢哋嘅老將伊雲洛域及加利卡希爾級數有別，而當艾斯派古達重任右閘，無論用羅拔堅尼地定艾度巴巴打左閘，都先後犯大錯，車仔近8場均有失波絕非偶然。

拖肥踢法有前冇後
「拖肥糖」愛華頓現時於聯賽僅排第12位，稍為令人失望，呢點同主帥馬天尼斯主攻踢法不無關係，單計聯賽佢哋已轟入51球，拍住「2哥」熱刺，只係少過李斯特城同曼城，當中前車仔箭頭盧卡古以18球位列射手榜次席，火力強橫。可惜其後防表現認真一般，尤其係近排改打3人防線，菲臘積基爾卡轉身慢，拉美路富尼斯摩利唔夠硬淨，史東斯表現明顯跌Watt，令「拖肥」攻守失衡。睇番雙方近4次碰頭，合共炮製20粒，有3場開入球大，包括1月頭聯賽踢成3比3，斯維覺得大盤更加好路。