尹戈爾例啅不死鳥
歐洲版「雙紅會」今晚強勢爆發！向來被忽視嘅歐霸盃，今屆16強有多場矚目戲碼，今晚首回合重頭戲非英超「雙紅」首次喺歐洲碰頭莫屬。利物浦今晚喺晏菲路主場迎戰曼聯，兩隊今季聯賽演出麻麻，不過「紅魔鬼」近期狀態明顯較好，加上自領隊尹戈爾上任後，將「紅軍」呢隻「不死鳥」玩弄於股掌之中，5次對壘全數勝出，今仗可博3.85倍客勝！

（now670周五凌晨4:05直播）

曼聯近期踢得幾醒神，上場聯賽雖然輸咗畀西布朗，不過呢場波桑馬達晨早被逐，輸波實在有啲冇運，反而之前喺足總盃、歐霸盃同英超拎到4連勝，可以話係今季曼聯最光輝嘅時間。「紅魔鬼」幾名小將虎虎生威，其中拉舒福特、連格、古利姆華利拿都成功上位，配合高質素嘅迪比同安東尼馬迪爾，論活力同侵略性都夠晒保證。

5次對紅軍全部贏晒
尹戈爾雖然被唔少曼聯球迷視為「衰神」，但對利物浦球迷嚟講就係最大「剋星」！原來尹戈爾執教曼聯之後，5次對住利物浦都贏波，包括今年1月作客晏菲路贏1:0。曼聯今場仲話會派白色波衫畀球迷，用白色力量對抗「紅軍」球迷聲勢，班「紅魔鬼」梗係要打好波報答粉絲啦！

利物浦踢慣海鮮波，上場聯賽贏水晶宮亦贏得冇說服力，上圈對住奧格斯堡兩回合都唔見得有優勢，最後只靠1個12碼淘汰對手，所以今仗表現好難有保證。雖然自高普執教鞭後，「紅軍」面對勁旅往往有唔錯嘅演出，但每次鬥剋星曼聯硬係冇晒辦法，今場捧客勝合理。