今晚歐聯16強次回合另一場比賽，由辛尼特主場迎戰賓菲加，辛尼特首回合踢到補時階段失手飲恨0:1，今仗返主場形勢上必定要搶攻，可惜球隊依家狀態麻麻，歇冬後3場正式賽90分鐘內都入唔到波，至於賓菲加今場擺明會穩守突擊，「入球細」開出機會高。

（有線61、64、201及203、中央5台周四凌晨1:00直播）

辛尼特前線啞晒火
辛尼特今仗有後衞基斯薛圖同防守中場查維加西亞停賽，球隊希望搶攻亦有後顧之憂，尤其歇冬後3場波都死氣沉沉，除咗俄盃加時贏波晉級外，3場波法定時間內都交白卷，今仗就算有主場之利唔係咁易入波。

賓菲加近期錄得4連勝，再加上連續9場作客贏波，不過今仗有中場安祖艾美達同後衞查度利華度累積滿黃牌停賽，門將施薩索拉斯同中堅安達臣雷沙奧亦因傷大有機會唔踢得，依家既然揸住一球喺手，梗係大玩穩守突擊，賓菲加近2仗都零失球，今場應該都頂得住唔失波，入球細抵玩。