歐聯16強展開次回合，皇家馬德里主場對意甲「雌狼」羅馬，雙方都奉行「華麗足球」，皇馬首回合領先2比0，相信返到自己地頭一樣照攻，首席射手C朗剛食完「大四喜」，羅馬好難招架得住佢。事實上羅馬落後緊兩粒，應會盡地一煲打番場好波，大細中位數3.5球照捧入球大。

（有線61、64、201及203台周三凌晨3時45分直播）

皇馬首回合作客贏2比0，晉級機會高唱入雲，但「銀河艦隊」球迷向來要求高，主場出擊無理由拉布Hea踢咁衰仔。事實上施丹季中接手皇馬後，將球員時代嘅「華麗足球」注入球隊，尤其係巴拿貝球場比賽更加瘋狂。呢位法國球王領軍下，6場主場贏5場，共攻入27球，換言之平均每場入超過4球。

巴利復出攻力升級
上仗西甲大炒切爾達7比1，C朗獨取4球，加里夫巴利傷愈復出亦有1球進帳，淨係呢對金鑽雙翼已足以反轉羅馬防線。由於皇馬喺聯賽已被榜首巴塞拋離，施丹亦坦言難以反超前，因此今季餘下最大目標就係歐聯，肯定每場踩行油搏盡，以免四大皆空。

另一邊廂，羅馬1月由史巴列堤接手領軍後，同樣大踢悅目足球，而且有姿勢有實際，近8場賽事只係首回合輸畀皇馬，其餘7場意甲全勝轟入22球。冬季加盟嘅艾沙拉維上陣6次已有5球進帳，入球率拍得住C朗。「埃及美斯」穆罕默德沙拿近3仗亦射入4球。羅馬中前場人才濟濟，如果肯推前主攻，入波機會相當高。

羅馬踢歐聯演慣入球騷
不過羅馬防守麻麻，當中歐聯分組賽3場作客失咗13球，其中兩仗更開出總入球[7+]，包括1比6大敗畀另一支西甲豪門巴塞隆拿。羅馬今仗焗攻之下，上演入球騷機會更高。