鋒將回巢脫胎換骨
澳職季後賽資格爭到頭崩額裂，今日獨腳戲就有場關鍵大戰，珀斯光輝主場迎戰紐卡素噴射機。呢兩隊波近期開行Turbo，全速爭上季後賽嘅「尾班車」。排第7位嘅珀斯光輝喺安迪基奧治回巢後脫胎換骨，近6次聯賽對紐卡素噴射機都順利贏波，擺到明剋住對手，一於再捧珀斯光輝2.32倍「讓球主勝」。

（有線64、203周一下午5:00直播）

「澳職MSN」火力猛
珀斯光輝突然間sharp醒晒，最大原因肯定係安迪基奧治1月回巢，呢位愛爾蘭射手喺近5場聯賽有4場拎到入波，佢拍住夏朗特同迪亞高卡斯度，簡直橫行 無忌，近期表現更被澳洲傳媒形容為「澳職MSN」，無可抵擋，更何況佢哋上仗主場入咗獅吼6粒，攻擊力夠晒保證。

仲有呀，佢哋上場力戰下臨尾香輸畀「1哥」西悉尼流浪者，可以話非戰之罪。查實佢哋上場輸波前，成功打出5連勝嘅走勢，班人狀態都幾弗，而且今仗只得左閘馬斯禾倫坐波監，其他主力全部候命，重響勝鼓唔難。

噴射機近6次聯賽交手輸晒
另邊廂嘅紐卡素噴射機近4場聯賽3勝1和，狀態大勇，不過今場對住「剋星」珀斯光輝就令人擔心，事關佢哋過去6次聯賽對珀斯光輝全敗，包括首循環喺主場大敗1:6，球員信心難免受到動搖，未踢就打窒咗道氣，今仗恐怕凶多吉少嘞！