美職周日深夜開鑼，洛杉磯銀河主場對華盛頓聯隊特別矚目，因為銀河除擁有2位前利物浦球星謝拉特、羅比堅尼外，今季再簽入前英格蘭國腳艾殊利高爾（A高）同埋荷蘭中場尼祖迪莊，人腳非常有睇頭，加上近7次主場對華盛頓聯隊拎到5勝2和，一於推介洛杉磯銀河主Ｗ。

（TVB 302周一早上11時直播）

銀河上季常規賽排西岸第5位成績麻麻，會方再次引入球星提升實力。35歲左後衞A高雖年事已高，但佢曾效力阿仙奴、車路士、羅馬，大賽經驗豐富，應付美職綽綽有餘。至於31歲嘅尼祖迪莊仍然當打，有佢負責中場防守，可以令謝拉特專注組織攻勢，提升球隊攻守能力，值得期待。

華盛頓聯主力箭頭離隊
華盛頓聯隊上季常規賽排東岸第4位，總分同銀河一樣都係51分。不過華盛頓聯隊作客成績甚差，上季常規賽17場作客僅有4勝3和10負，佢哋近7次作客洛杉磯銀河更錄得2和5負劣績。華盛頓聯隊上季主力前鋒龐迪斯已離隊，但就冇簽入具級數球星頂替，睇怕難同銀河抗衡。