俄超歇冬後戰火重燃，今晚上演「莫斯科打吡」，莫斯科中央陸軍主場對莫斯科斯巴達。中央陸軍早前已經率先踢咗1場俄羅斯盃，以2比0擊敗烏法，有辦畀大家睇，證明狀態良好。反觀斯巴達休戰3個月，狀態成疑，加上之前兩季歇冬後首戰都輸，實在靠唔住，捧中央陸軍主勝。

（有線64、203台周一凌晨零時30分直播）

計往績斯巴達輸蝕
榜首嘅中央陸軍喺歐聯分組賽包尾出局，連歐霸盃都冇份踢，因此餘下目標，就係全力爭奪聯賽冠軍，以及俄羅斯盃。中央陸軍日前已率先打入俄盃4強，正好為聯賽重開壯行色。更何況中央陸軍近年一直食住斯巴達。雙方近4次聯賽交鋒，中央陸軍取得3勝1負，包括今季首循環作客贏2比1，今仗回師主場，勝算更加高。

至於斯巴達近年歇冬後表現麻麻，過去兩季歇冬後第1場比賽都輸波，包括上季主場以1比3不敵卡斯洛達，前季則以0比1輸畀泰歷克。加上斯巴達近兩場聯賽作客都贏唔到，遇上勁旅中央陸軍，實在凶多吉少。