爆完拜仁追擊達斯泰特
德甲周日早場緬恩斯主場迎戰達斯泰特，緬恩斯已經成為今年德甲最強勢嘅球隊，風頭甚至蓋過班霸拜仁慕尼黑同多蒙特，家陣甚至想挑戰下屆歐聯參賽資格，今晚喺全場爆滿嘅高菲斯球場，迎戰下滑中嘅鄰居達斯泰特，戰意同士氣都滿瀉，緬恩斯讓半一問題唔大，黑柴撐2.09倍上盤。

（now 672、有線64及203台周日晚10時30分直播）

衝創會以來首個歐聯席位
緬恩斯近期弗到爆燈，近6仗主場聯賽5勝1和，先後擊退禾夫斯堡、慕遜加柏、史浩克04同利華古遜等勁旅，令整個德國球壇起哄，點知高處未算高，啱啱周四凌晨佢哋陣容不整之下作客安聯球場對班霸拜仁，竟然贏埋！除咗令拜仁主場德甲12連勝紀錄告終外，佢哋喺積分榜上亦追到同第4位嘅慕遜加柏同分，下季甚至有機會創會以來首次參戰歐聯添！

兩軍交鋒例全場滿座
贏完拜仁，緬恩斯上下未見放鬆，立即備戰今仗，點解？緬恩斯位處德國西南部萊茵河中游嘅萊因蘭 —普法爾茨州，喺過去佢哋最為人關注嘅係對法蘭克福嘅「萊茵河打吡」，但實際上達斯泰特同佢哋距離更只有30公里。今季首循環達斯泰特主場對緬恩斯，就掀起當地球迷撲飛潮，結果緬恩斯作客喺全場爆滿下贏3比2，今晚緬恩斯主場門票一樣賣晒，體育總監凱度話緬恩斯對達斯泰特已經係一場準打吡，只要兩會持續發展，呢個打吡對決將會愈嚟愈受到關注。不過，達斯泰特今晚作客高菲斯球場似乎係錯誤時候，佢哋近況下滑近4場聯賽合共只得1分，戰術被洞悉後已經不再神奇，面對強勢兼高度重視今仗嘅緬恩斯，相信幾難爆冷。