今晚英超早場上演火爆嘅北倫敦打吡，由「2哥」熱刺主場硬撼「3哥」阿仙奴，正所謂打吡戰實打甩髀，呢對北倫敦勁旅鬥足百年，可謂仇深似海，但阿仙奴啱啱經歷6年來首度3連敗，後防主力哥斯尼及鋼門施治都因傷倦勤，士氣及實力俱受削，加上近6次聯賽造訪熱刺輸咗4仗，受讓平半亦咪掂，捧番熱刺上盤。
（now 621周六晚8時45分直播）
阿仙奴傷兵多近況差
頭兩名嘅李斯特城及熱刺於周中快車相繼失分，但阿仙奴未能把握大好良機，竟喺主場遭護級分子史雲斯反勝2比1，連同之前輸畀巴塞及曼聯，錄得6年來於各項賽事首次3連敗，都咪話唔傷，主帥雲格畀粉絲鬧到拆天。阿仙奴箭頭基奧特已連續7仗食白果，禾確特、韋碧克等時好時壞，中場艾朗藍斯又頻頻斷纜，成班波都踢到冇晒信心，就算中場核心奧斯爾踢到曉飛都冇用。屋漏偏逢連夜雨，鋼門施治及中堅哥斯尼喺呢個關鍵時刻受傷缺陣，對原本不穩嘅防線更加係會雪上加霜，隨時中門大開。
熱刺雖然於周中同樣不敵韋斯咸，痛失升上榜首嘅機會，但其實表現唔算差，呢班波今季喺低調中靜靜地起革命，唔聲唔聲就殺上次席。熱刺主帥普捷天奴主打全場壓迫戰術，對體能及速度很高要求，因此重用年輕球員，哈利卡尼、迪利阿里、艾歷迪亞、基斯甸艾歷臣在其麾下盡展所長，今季熱刺正選陣容平均年齡約24歲，冇一名年過30，經常壓到對手透不過氣，迫使敵方犯錯，然後作出致命一擊。
作客白鹿徑例冇運行
數據顯示，熱刺今季入49球失22球，得失球差+27係英超最佳，單計主場聯賽只曾兩敗。加上阿仙奴近6次聯賽作客熱刺只錄得1勝1和4負嘅劣績，擺明畀死敵食住，今仗再造訪「凶地」白鹿徑實難逞強，熱刺既為追趕榜首嘅李斯特城，又希望贏死敵攞彩，今仗一定唔會腳軟，小讓平半值得捧場。
