打響頭炮乘勝追擊砂岩
周末有大量受注賽事，由下午日職開始玩起，頭場鹿島鹿角主場對鳥棲砂岩。傳統勁旅鹿島鹿角上輪開鑼戰旗開得勝，擊敗爭標熱門大阪飛腳，可見球員已操起狀態，火速上力，加上近5次鬥鳥棲砂岩贏咗4次，而且都係淨贏兩球或以上，可謂信心保證，直取讓球主勝。

（有線61及201台周六下午2時直播）

首仗客勝飛腳顯霸氣
鹿島鹿角上季次階段聯賽獲得亞軍，但由於首階段成績差，未能進身爭標季後賽。不過佢哋始終根基深厚，今季捲土重來，鬥心更加強，首仗作客對上季總亞軍大阪飛腳，佔上風贏1比0，盡顯霸氣。鹿角取得好開始，更添爭標信心，值得再追一口。至於鳥棲上仗主場僅贏新升班嘅福岡黃蜂2比1，表現麻麻。最大鑊係一直被鹿角食住，上季主場都吞對方3蛋，今仗作客更加冇運行。

黃蜂水手「細」均力敵
另一場日職直播賽事，福岡黃蜂主場對橫濱水手，水手上季首席射手艾迪美臣巴拉加已經離隊，對球隊打擊好大，上仗主場對弱隊仙台維加泰都入唔到波，以0比1敗陣，充分暴露鋒力不足問題。中場球星中村俊輔已經37歲，水準大不如前，唔好對佢抱有太大期望。福岡黃蜂新升上日職，需要時間適應比賽節奏，估算季初難有作為，建議選擇入球細。

（有線61及201台周六晚6時直播）