澳職今日有場獨腳戲，由排第3嘅布里斯班獅吼主場對榜首嘅西悉尼流浪者。獅吼近期表現麻麻，球隊近3仗失咗11球防線穿窿，今次就算主場出擊，相信亦難贏近期表現唔錯嘅西悉尼流浪者，平手盤阿謙推介西悉尼流浪者。（有線64及203台周五下午5時直播）

獅吼雖然排喺聯賽榜第3位，但近況真係不敢恭維，球隊近3仗未贏過之餘，仲喺呢3場波失咗11球，當中以畀珀斯光輝攻入6球最誇張。獅吼陣中只有後衞普蘭斯同前鋒桑蘇拿辛奴因傷缺陣，但球隊防線弱不禁風，今仗面對榜首球隊西悉尼流浪者，縱有主場之利，但要成功反彈相信絕非易事。

卡斯迪倫腳風順
西悉尼流浪者上仗主場擊敗珀斯光輝，整體表現唔錯，佢哋今仗雖有後衞杜普史丹利因為儲滿黃牌要停賽，而中場維度錫有傷唔出得，但球隊防線近期表現唔錯，加上上仗有波入嘅卡斯迪倫同辛達利比都可以上陣，面對後防穿窿嘅獅吼應該可以贏波，平手盤當然捧西悉尼流浪者。