鞏固榜首優勢唔衰得
澳職今日上演重量級大戰，由「3哥」布里斯班獅吼主場迎戰「1哥」西悉尼流浪者。兩隊目前只有3分距離，不過獅吼近期狀態低迷，相反流浪者喺西班牙中場安特里奧領軍下，成隊波當堂sharp醒晒，上仗仲重響勝鼓添，今場贏埋就可以進一步鞏固榜首位置，2.45客勝點可以唔博先？

（有線64及203周五下午5:00直播）

獅吼占美麥卡倫踢到殘
布里斯班獅吼近期表現大失準，近2場3:6同0:3嘅恥辱性敗仗重創球員信心，尤其獅吼班波入面有唔少年輕球員，逆境波絕對唔係咁易面對，好似22歲王牌前鋒占美麥卡倫，經歷連場征戰後開始顯露疲態，弊在獅吼依然要旨意佢單天保至尊，事關隊波近12個士哥有5球都係靠佢入，真係鐵人都踢死啦！最慘嘅係德國中場布萊治受頸傷困擾未必踢得，更加重隊友負擔，有主場之利都信唔過。

流浪者攻守瓣瓣掂
西悉尼流浪者上仗2:1力克珀斯光輝，終止3場不勝走勢，前鋒維度錫大腿受傷多數倦勤，好彩「超級後備」辛達利比上場做咗絕殺英雄，有佢擔正一樣畀到人信心。最重要係西班牙中場安特里奧狀態提升，令成班波嘅攻守表現大大加強，有呢位傳球大師坐鎮，今場有望反客為主拎晒3分！