三線作戰未必搏盡
今晚繼續有西甲快車陪大家，西甲一哥巴塞隆拿作客下游分子華歷簡奴。由於「地上最強」需要三線作戰，賽程頻密，為免搏殘「MSN」等主力戰將，佢哋喺作客場合甚少大開殺戒，近5仗作客開4次入球細，預計華歷簡奴未必會大敗。既然今仗入球大細中位數升至3.5/4球咁辣，2.02倍入球細值得捧場。

（now632台周五凌晨4:00直播）

巴塞隆拿坐擁美斯、蘇亞雷斯、尼馬組成嘅「MSN」鋒線，的確令各隊聞風喪膽。不過佢哋因西班牙盃、歐聯及聯賽補賽關係，自從由1月開始keep住一周雙賽，賽事排得勁密。主帥安歷基為免搏殘眾將，除咗不時作出適當輪換，每逢客場更明顯刻意收疆，唔似以前咁殺得性起下下大數對手。

拎3分緊要過大勝
好似上輪西甲作客弱旅拉斯彭馬斯咁，巴塞喺半場領先2:1後特登放慢節奏，保持呢個比數直至完場，睇得出佢哋務實搶分嘅風格。查實「地上最強」近5仗作客4次開出入球細，可見安帥深明收放之道。更何況佢哋lead住「二哥」馬體會5分，相信佢哋志在贏波拎3分，保持優勢，未必搏盡大炒對手。

華歷簡奴狀態弗守得住
另邊廂嘅華歷簡奴近7仗聯賽不敗，護級重現曙光，可惜呢班波近年出戰巴塞經常大敗收場，包括首循環慘負2:5。為免重蹈覆轍，今仗主場出擊料會先做好防守，盡力減少失球，再伺機反擊，相信巴塞頂多小勝而回，開出入球細機會高。