英聯盃飲恨 冤家曼城送上門
啱啱喺英聯盃決賽飲恨嘅利物浦，話咁快就有報仇機會，今晚於英超快車主場硬撼新鮮出爐嘅英聯盃盟主曼城。正所謂仇人見面分外眼紅，紅軍日前打到互射12碼階段輸畀曼城失落冠軍，條氣梗係唔順喇，難得死對頭咁快送上門，令戰意極速升溫，主帥高普話明要盡快反彈，紅軍眾將勢必變身「復仇勇者」，加上近年喺晏菲路球場對「藍月亮」未輸過，1.84倍平手盤有買趁早！
（now 621周四凌晨4時直播）
剛周一凌晨嘅英聯盃決賽，利物浦同曼城激戰120分鐘亦未分高下，最終紅軍去到12碼階段遇着「上晒身」嘅神龍韋利卡巴尼路，最終輸1比3堅唔抵。紅軍主帥高帥賽後揚言，佢哋會好快會百分百振作起嚟，勢估唔到咁快重遇仇人，紅軍上下必定想要報番一箭之仇，淨係呢份復仇者欲一雪前恥嘅決心，已經秤高少少喇。
近13次晏菲路擺陣未輸過
最重要係利物浦喺主場出戰曼城未驚過，佢哋近13次喺晏菲路球場對住「藍月亮」未嘗敗績，取得8勝5和優異成績，今仗開平手盤，捧紅軍肯定坐和望贏。
曼城捧完盃易心散
曼城剛捧走英聯盃，球員心態難免會鬆懈，而且未踢今輪聯賽之前，佢哋已經落後踢多場嘅榜首李斯特城9分，爭標機會愈見渺茫。最重要係自早前宣布主帥比歷連尼教到今季季尾便離隊後，近6仗正式賽事，只有2仗於法定時間內贏波，其中1仗仲要係歐聯16強首回合贏基輔，睇得出比帥已將重心放喺歐聯度，聯賽只需保住前4，撞正復仇心切嘅紅軍難有運行，平手盤力撐利物浦。
