板櫈深度贏成條街
西甲周中開快車，今晚皇家馬德里將會造訪「包尾大幡」利雲特。「銀河艦隊」同利雲特喺上輪聯賽同樣見負，雙方今仗均有後防大將停賽，加上快車檔期，板櫈深度勢成今仗贏波重要關鍵。講到板櫈深度，利雲特就肯定差皇馬成條街啦，冇理由唔博皇馬1.95倍讓球客勝喎！

（now632台周四凌晨4:00直播）

占士謝斯仔落場數胡
皇馬喺聯賽落後畀宿敵巴塞隆拿12分，後上奪冠機會渺茫。相信主帥施丹會用聯賽實戰嚟執好隊波，將目標放o係歐聯仲實際。今仗佢哋雖有前鋒賓施馬，翼鋒加里夫巴利未好番，守將沙治奧拉莫斯、丹尼爾卡華積停賽，好彩仲有占士洛迪古斯、謝斯洛迪古斯幫手數胡，加埋C朗攻堅，整體級數依然喺對手之上。

另邊廂嘅利雲特上仗0:3大敗畀維拉利爾，睇番佢哋呢場波嘅防守非常鬆散，單係上半場就送咗4個黃金機會畀對手。即使佢哋吞住2隻蛋返衣室，換邊後未有改善不特止，甚至極速落後至0:3添。如非維拉利爾及後放軟手腳，利雲特隨時被人數5、6球都似。

利雲特守衞隊長停賽
更大鑊係隊長大衞拿華路喺上仗被逐要坐波監，隨時派出今季西甲上陣時間不足200分鐘嘅守將麥贊尼落場，真係睇見都唔放心。再者利雲特近7場有6仗失至少2粒，想以咁嘅防線守住皇馬，怕且都係天方夜譚咯。