復仇勇者 高普領軍
英聯盃飲恨，紅軍晏菲路擺陣報仇！利物浦啱啱喺英聯盃決賽，打到互射12碼階段輸畀曼城失落冠軍，無論主帥高普定成班球員都肯定唔順氣。好在復仇嘅機會話咁快就嚟，紅軍將於今晚英超快車賽期，回師主場再同「藍月亮」鍊多鋪。憑住佢哋復仇心切，加上球隊近年喺晏菲路球場對曼城未輸過，1.84倍平手盤可謂坐和望贏，點可以唔撐！

（now 621台周四凌晨4:00直播）

今屆英聯盃決賽戰情緊湊，兩軍鬥足120分鐘亦難分勝負，最終紅軍去到12碼階段輸1:3飲恨，同獎盃擦身而過，球隊上下點會唔傷心。主帥高普賽後揚言會幫球隊極速反彈：「我哋一定會反撲，只有傻瓜先會坐喺地下郁都唔郁，等待下一場失敗，我哋好快會百分百振作起嚟！」難得短時間內重遇仇人，紅軍上下點會唔眼紅吖，今次梗係要報番一箭之仇啦，單係呢份鬥心就已經值得秤先！

近13主場對戰8勝5和
更何況利物浦喺主場比賽，根本未驚過曼城，雖然「藍月亮」近年升咗呢，成為英超爭冠分子，不過紅軍喺晏菲路球場出戰始終佔有優勢，佢哋近13場主場鬥曼城從未輸過，取得8勝5和優異成績，至少封咗道蝕本門先！最近2鋪紅軍更加係先開紀錄嗰隊，贏得極有說服力。

曼城慶祝過後或鬆懈
相反曼城啱啱贏咗英聯盃冠軍，球員心態無可避免有所鬆懈。況且球隊喺聯賽連輸2鋪，未踢今輪聯賽之前，已經落後踢多場嘅榜首李斯特城9分，爭冠機會愈見渺茫。咪忘記今季係領隊比歷連尼最後一季執教球隊，唔排除佢會將歐聯列為首要目標，聯賽只要力保前4就算。加上曼城陣中年過30嘅老將唔少，主力耶耶托尼、費蘭甸奴同大衞施華均搏到盡，未必咁快回得切氣，睇怕呢鋪難擋紅軍復仇咯。