倫敦雙雄阿仙奴同熱刺繼續力追榜首嘅李斯特城，排第3嘅「兵工廠」將於主場迎戰「天鵝」史雲斯。阿仙奴剛喺周日英超不敵曼聯，爭標希望大受打擊，影響士氣，「天鵝」過往對「兵工廠」戰績唔輸蝕，近4次對碰僅錄1負，當中3戰皆開半場和，今仗半場和博得過！

（now 623周四凌晨3時45分直播）

阿仙奴今季畀人話好有冠軍相，上月榜首大戰更臨完場絕殺李斯特城，點知上場作客曼聯隊波又唔生性輸2比3，搞到依家落後李斯特城5分，爭標出現危機。

連續喺歐聯同英超輸畀兩大宿敵巴塞隆拿同曼聯後，「兵工廠」只係抖咗大約3日，今日就要硬撼史雲斯。「天鵝」上場作客熱刺爭啲搞到對手失分，阿仙奴今場唔易踢，「兵工廠」近期主場表現慢熱，近5仗主場四度開出半場和，一於再追！

熱刺衝冠強襲韋斯咸
至於落後李斯特城2分排第2位嘅熱刺就會作客韋斯咸上演「倫敦打吡戰」。熱刺對上一次贏頂級聯賽冠軍係1961年，相距至今已經55年，難得今季有機會爭標，決心無庸置疑。熱刺喺聯賽豪取6連勝，狀態大勇，韋斯咸首循環作客熱刺大敗1比4，而熱刺近3次作客「錘仔幫」亦錄得2勝，有格食格味道，今場客勝值捧。

（now 622周四凌晨3時45分直播）