今個周中繼續有亞冠盃分組賽，暫列F組次名嘅FC山東（山東魯能），將會喺主場迎戰泰國豪門武里南聯，作為中超爭霸勁旅之一，山東絕對有條件炒對手3、4球，2.35倍「讓球主勝」或者2.1倍「主主」都係最佳嘅投注選擇。

睇死武里南聯唔掂，並唔單純因為山東外援質素高成班波有多，最主要係客隊打少兩件中場主將，當中泰超上季神射手迪奧高嘅養傷，對武里南聯打擊最沉重，呢件森巴兵响上星期慘吞韓職班霸FC首爾6蛋嗰陣受傷，肩部韌帶撕裂，即時要飛返巴西開刀，起碼休息3個月。武里南聯冇咗佢，等於曼聯冇咗朗尼，或者巴塞冇咁美斯，事關迪奧高上季响32場賽事入咗33球，仲有10次助攻，幾乎係一個踢晒咁滯。

更令武里南聯頭痛嘅係，中場8號仔蘇潮努農又唔生性，上場肉酸飛剷首爾件日援高萩澤次郎，搞到做咗紅牌阿姑，今日要坐波監，連累武里南聯一時間少咗兩件骨幹，去到山東捱打得嚟想反抗吓都冇本錢。

國奧生牯仔激活球隊
小組首戰客場反勝廣島三箭嘅山東，公認搵到個好教練，自從文奴文尼斯上任後8連勝嘅佢哋，同上季比較明顯攻守平衡咗好多，而且文帥响調兵遣將有一手，好似上場對廣島落後一球，佢馬上派出吳興涵、張文釗激活隊波，利用速度焗到廣島班人扯晒蝦從而反勝，認真有辦法。

今日對住武里南聯，山東都預咗對方縮後死守，所以推出一款以「奔跑吧，少年！」嘅宣傳海報，似乎就會利用一班劉彬彬、吳興涵等一班國奧生牯仔放乾對手，肯定一開波就去搶，開出「主主」好正路，「讓球主勝」亦都唔奇。