今晚意甲雙料娛樂，重頭戲係兩支前列球隊交鋒，費倫天拿主場鬥拿玻里！拿玻里連接喺聯賽及歐霸盃失利，更爆出老闆迪羅倫迪斯同射手希古恩不和事件，勢必加速呢位阿根廷國腳離隊，令球隊雪上加霜。至於費倫天拿亦喺歐霸盃出局，士氣亦唔會好得去邊，加上論往績一向被拿玻里食住，想發圍亦唔容易，最好揀入球細。

（TVB301周二凌晨4時直播）

希古恩啞火兼有離心
拿玻里繼早前榜首之戰輸畀祖雲達斯，失去一哥位置後，上周中亦喺歐霸盃出局。最攞命係爆出首席射手希古恩拒絕續約，準備今季轉投車路士或巴黎聖日耳門等豪門。拿玻里老闆迪羅倫迪斯亦不甘示弱，公開批評希古恩貪錢、跳草裙舞，仲寸佢近期肥咗幾磅，應該加操重拾狀態。

希古恩今季聯賽已轟入24球，高踞射手榜一哥，但包括歐霸盃在內近4仗都食白果，表現明顯跌Watt，睇嚟迪羅倫迪斯嘅批評並非全無道理。不過，希古恩聽完呢番言論肯定躁上加躁，離隊更堅決。如果佢無心戀戰，拿玻里攻力肯定大打折扣。事實上，拿玻里已連續6場開細，值得再追。費倫天拿同樣喺上周中歐霸盃出局，「紫百合」近6次主場對拿玻里錄得2和4負劣績，所以就算拿玻里狀態低迷，恐怕費倫天拿亦未必佔到甜頭，受讓都唔穩陣，建議揀入球細。

拉素主W有薩冇賠
另一場意甲拉素主場對薩斯索羅，意甲球隊之中，拉素今期最威，打入歐霸盃16強，近4仗主場亦贏3仗。薩斯索羅近8仗贏得1仗，今仗仲有中場主力米斯萊利停賽，更加難同對手抗衡，捧主勝。

（TVB301周二凌晨2時直播）