今晚葡超獨腳戲，榜首嘅士砵亭作客甘馬雷斯。士砵亭剛於歐霸出局，谷埋成肚火，必定全力爭奪聯賽冠軍，但甘馬雷斯近期主場戰績非常Sharp醒，加上前鋒歷卡卡路士腳風甚順，預計會合演一場入球騷，大盤更加值博。

(有線155台周二凌晨4時直播)

士砵亭今季由同市宿敵賓菲加功勳教頭佐治捷西斯「叛逃」執教後，不再像前幾季只係波圖與賓菲加爭標路上嘅陪跑者，單係前鋒施利文尼就入咗18球排射手榜「阿二」，戰績穩定性大為提升，至今踢咗23仗只嘗1敗，難怪可以暫居榜首啦！雖然士砵亭啱啱喺歐霸32強兩回合計以1比4被利華古遜踢出局，但佢哋可更加集中火力爭奪聯賽，毋須再為歐洲賽分神，而出局嘅怒火，勢必令佢哋於今仗更加搶韁求勝。

甘馬雷斯有本錢鬥攻
不過，對手甘馬雷斯亦唔易應付，佢哋已經連續8仗未輸過，而近4主場錄得2勝2和，包括擊敗波圖，前鋒歷卡卡路士腳風頗順，近4仗入3粒，而首席射手漢歷基杜拉度、奧達維奧艾美臣亦頻頻士哥，若以中位數2.5球計，甘軍近8仗有6仗開入球大，火力全開唔嘢小，加上主場出擊更加唔會龜縮。

未計周日戰果，士砵亭只領先次席賓菲加3分，絕對不能鬆懈，預計雙方難免駁火鬥攻，士砵亭嘅客W得1.44倍略嫌乏味，寧願轉捧1.75倍嘅大盤。